لسائقي الدَّبَّابات في النّاصفة من شهر شعبان و شهر رمضان …

ما هو وقتكم تطلعوا ليلة الميلاد
في النّاصفه و اتأذّوا خلگ اللَّه و لعباد

هذي ليالي امشرّفه و عالي قدرها
و الما عرف ليها قدر يُحرم أجرها
و ازعاجكم بيها ترى نغّص بُشرها
اطراماتكم وشجابها ما بين لولاد ؟!

الاطفال تمشي بالفريگ ويّا النّسا ادّور
كلمن يناصف بالهنا و يترجّى لسرور
و دبّابكم صوته كأنّه نفخة الصُّور
حوّلتوا فرحتهم كدَر لا سنع و ارشاد

و فوگ الضّجيج المزعج اتشغلوا أغاني
متراعوا حرمه و لا طفل و القهر جاني
واقعكم المُر بالفعل حثني و دعاني
اكتب قصيده و انكر الفوضى و لعناد

كل فرد منكم سبّب الفوضى و لزعاج
و عكّر على الوادم فرحها و عكّر امزاج
مسجّل ابديوانه إثم يشبه الخِرّاج
كل عام هالبلوه وسافه اعلينا تنعاد

مولِد الحجّه بن الحسن و الحسن الازهر
بيهم الوادم تبتهج و الگلب يستر
بتخريب ما يرضوا و لا يرضوا بمنكر
من هالمهايط كيف منهم يصبر افَّاد ؟!

ليش البعض منكم گلص خلفه ابنيّه
و اخر يركّب له چلِب موضه غربيّه
مسخره و فوضى و مهزله ملها مزيّه
متراعوا خلگ اللَّه و گبلهم ربّ لعباد

طول السَّنه عدكم و لا اطّلعون بيها
بس ليلة النّص تطلعوا اتهيصون فيها
و العلَّه بالنّفس الوعي ما مر عليها
و ابليس يطرب من فعلكم كنّه باعياد

تدرون بالحُجّه الولي ينظر فعلكم
اتهيجون جرحه لو صبح باطل عملكم
اسأل الباري برحمته يهدي جمعكم
و اتبطلوا هذي المهزله عنكم و الافساد

خلُّوا الوادم تنعم ابفرحه و سعاده
بمولد الحُجّه و الحسن راعي السِّياده
و نظهر ابمظهر زين في ليلة عِبَادَه
بجاه النّبي و العترة السَّادة الأمجاد .